राजविराज नगरपालिकाका लागि नेपाली कांग्रेसबाट मेयर पदका उम्मेदवार इर्साद अन्सारी स्थानीयका लागि चिरपरिचित नाम हो ।
४७ वर्षीय अन्सारीले विद्यालयमा अध्ययनरत रहँदा २०४६ सालमा नेपाल विद्यार्थी संघबाट राजनीति सुरु गरेका हुन् । २०५१ सालमा महेन्द्र विन्देश्वरी क्याम्पस राजविराज इकाईका नेविसंघ सभापति बन्न सफल भए ।
२०६१÷६२ को जनआन्दोलनमा राजविराजमा नेतृत्वदायी भूमिका निर्वाह गरेका उनको छवि आन्दोलनकारी नेताको रूपमा बनेको छ । २०६३ सालमा उनी नेविसंघको महामन्त्री बनेपछि पार्टीको मूल राजनीतिमा होमिए ।
कांग्रेस पार्टीको ३५ वर्षको राजनीतिमा उनी स्वच्छ छविका इमानदार र सिद्धान्तवादी युवा नेताको रूपमा चिनिन्छन् ।राजविराज नगरपालिकामा अहिलेको युग अनुसार शिक्षा, स्वास्थ्य र रोजगारको क्षेत्रमा काम हुन नसकेकोले यी क्षेत्रमा नतिजामुखी काम गर्ने उनको प्रतिबद्धता छ ।
‘लोकतन्त्रपछि पनि यहाँका जनताले विकासको अनुभूति गर्न सकेका छैनन्, मलाई जनताले जिताए भने उनीहरूले अनुभूति गर्न सक्ने गरी काम गर्छु’ अन्सारीले भने ।
जीवनको ३५ वर्ष निष्ठाको राजनीति गरेकोले राजविराज नगरवासीले आफूलाई विजयी गराउने उनको विश्वास छ । ‘म जनताको सेवक भएर काम गर्छु, शासक भएर होइन’ उनी भन्छन्, ‘मैले जीवनमा स्वच्छ राजनीति गरेको छु । अब पनि जनसेवामा समर्पित रहनेछु ।’
राजविराज–४ का स्थायी बासिन्दा इर्साद जाति र धर्मभन्दा माथि उठेर निष्ठाको राजनीति गर्नुपर्नेमा जोड दिन्छन् । यस पटकको पालिका निर्वाचनमा प्रतिस्पर्धामा देखिएका उम्मेदवारहरू कुनै न कुनै पेशा–व्यवसायमा संलग्न रहेको र आफू विशुद्ध राजनीतिकर्मी भएकोले जनताले आफूलाई मत दिने उनको विश्वास छ ।
‘मेयर जस्तो राजनीतिक पदमा विशुद्ध राजनीति गर्ने व्यक्ति पुगे मात्रै उसले जनताको लागि परिवर्तन ल्याउन सक्छन्’ उनी भन्छन्, ‘त्यसैले जनताले मलाई मत दिएर विजयी बनाउँछन् भन्नेमा दुईमत छैन ।’