रामकुमार थापा
विजयी
एमाले अध्यक्ष केपी शर्मा ओलीका लागि प्रतिष्ठाको विषय हो, झापाको दमक नगरपालिका । यही बुझेर गृहनगरमै ओलीलाई चुनौती दिन सत्ता गठबन्धनले राजेन्द्र लिङ्देन नेतृत्वको राष्ट्रिय प्रजातन्त्र पार्टी (राप्रपा) सँग गठबन्धन गरेको छ ।
सत्तारुढ दलहरू र राप्रपा मिलेर बनाइएको संयुक्त गठबन्धनबाट दमकको मेयरका लागि राम थापा अघि सारिएका छन् । थापा राप्रपाका प्रदेश नं. १ का अध्यक्ष पनि हुन् । दमकमा मेयरको प्रतिस्पर्धामा राम थापा नयाँ पात्र होइनन् । उनी यसअघि पनि दुईपटक दमकको मेयर पदमा उम्मेदवार बनिसकेका छन् । तर दुवैपटक एमाले उम्मेदवार रोमनाथ ओलीसँग उनी पराजित भए ।
२०७४ मा सम्पन्न स्थानीय निर्वाचनमा उनी ओलीसँग ३ हजार ११५ मतान्तरले पराजित भएका थिए । २०५४ सालको निर्वाचनमा पनि उनै ओलीसँग राप्रपाका उम्मेदवार थापा पराजित भएका थिए । यसपटक सत्ता गठबन्धनको पनि साथ पाएपछि थापा तेस्रो पटकको प्रयासमा विजयी हुनेमा विश्वस्त देखिन्छन् ।
‘अघिल्लो चुनावमा दोस्रो स्थानमा थियौं’ उनी भन्छन्, ‘अहिले तेस्रो र चौथो शक्तिसहित एकीकृत समाजवादी पार्टीको समर्थन हुँदा जित सुनिश्चित छ ।’ पाँचथरमा २६ असोज २०१३ मा जन्मिएका उनी २०२६ सालमा बसाइँ सरेर दमक आएका थिए । अध्ययनका क्रममा उनी २०३० सालदेखि राष्ट्रवादी स्वतन्त्र विद्यार्थी मण्डलमा सक्रिय भए । पछि उनी सोही संगठनको केन्द्रीय उपाध्यक्ष पनि भए ।
२०३९ सालमा दमक बहुमुखी क्याम्पसमा राजनीतिशास्त्रबाट स्नातक तह उत्तीर्ण गरेका उनी तत्कालीन दमक वडा नं. १२ को वडाध्यक्ष पनि बनेर १२ वर्ष लगातार वडाको नेतृत्व गरे । पछि प्रधानपञ्चको चुनाव लड्दा उनी झिनो मतान्तरले पराजित भए । उनलाई पञ्चायतमै ९ महिनाका लागि मनोनीत मेयर पनि बनाइएको थियो ।
दोस्रो संविधानसभाको निर्वाचनमा थापाले झापा क्षेत्र नं. ७ बाट केपी ओलीसँग प्रतिस्पर्धा गरेका थिए । त्यतिबेला ओलीले १९ हजार २८७ मत ल्याउँदा कांग्रेसले ११ हजार ४१ मत पाएको थियो भने थापा ९ हजार ३३५ मतसहित तेस्रो स्थानमा खुम्चिए ।
राप्रपामा उनी स्थापनाकालदेखि नै सक्रिय छन् भने दमकको नगर सचिव, अध्यक्ष हुँदै हाल प्रदेश कमिटीको नेतृत्व गरिरहेका छन् । दमकमा उनी दमक क्याम्पस, खानेपानी, कनकाई माई मुक्तिघाट लगायतमा संलग्न भएर सामाजिक काममा सक्रिय थिए ।
एमाले अध्यक्ष ओलीलाई हराउन उनलाई गठबन्धनले उठाएको चर्चा भइरहँदा थापा भन्छन्, ‘दमकमा अघिल्लो नेतृत्वले राम्रो काम गरेको थिएन, फेरि गठबन्धनले मात्र दमकमा जित्न सम्भव थिएन । त्यसैले एमाले हराउन नभई दमकको हितका लागि तालमेल गरेका हौं ।’
दमकको मेयरका लागि उम्मेदवारी दिंदै गर्दा थापाले नगरपालिकालाई सेवा गर्ने थलोको रूपमा विकास गर्ने एजेण्डा अघि सारेका छन् । ‘हामी नगरपालिकालाई शासन गर्ने ठाउँ होइन, सेवा गर्ने परिसर बनाउने छौं’ उनले भने, ‘हाम्रो नेतृत्वमा दमकलाई उदाहरणीय नगर बनाएर देखाउँछौं ।’
उनले आफू विजयी भए कक्षा १२ सम्म निःशुल्क पढाउने र विपन्नका लागि सुलभ स्वास्थ्योपचारको व्यवस्था गर्ने योजना अघि सारेका छन् । उनीहरूका लागि खाद्यान्नको व्यवस्था गर्ने पनि उनको योजना छ ।
सवारीको पटके करलाई पनि खारेज र अव्यावहारिक रूपमा लागु गरिएका करलाई परिमार्जन गर्ने थापाले प्रतिबद्धतामा उल्लेख गरेका छन् । ‘दमकलाई स्वास्थ्य, शिक्षा, व्यवसाय र आयआर्जनको कुरामा व्यवस्थित नगर बनाउँछौं’ उनी भन्छन्, ‘दमकलाई समुन्नत नगर बनाउने हाम्रो लक्ष्य हो ।’
थप उम्मेदवारहरु
थप मेयर उम्मेदवारहरु
